Europaren politika migratzaile "kriminala" salatu, eta Espainia horren "jarraitzaile sutsua" dela esan dute Euskal Herritik Greziara joandako karabanako kideek, bidaiatik bueltan. Hala, nazioarteko "elkartasun eta laguntza sareak ehuntzen" aritu direla argitu dute.
Ikusitakoa ikusita, Euskal Herrian mobilizazioak eginen dituzte. Iruñekoa bihar izanen da, ostiralarekin, 19:00etan, Iruñeko udal plazatik aterata. Bilbon eta Gasteizen ere kalera ateratzera deitu dituzte herritarrak.
Errepresioa: "Kolpe latza"
Europar Batasunaren migrazio politika "kriminalak" salatu dituen karabanarekin joan ziren bi ekintzaile iruindar hartu zituen atxilo Greziako Poliziak atzo, beste lagun askorekin batera, migratzaileentzako hiru etxe okupatu hustean. Gaur pasako dira epaile aurretik, 12:00etan.
Operazioa migratzaileen aldeko gizarte mugimenduari emandako "kolpe latza" izan dela salatu dute, gaurko prentsaurrekoan: "Kolpe errepresibo honekin Greziako Gobernuak zera adierazi nahi du: ez dagoela tokirik migratzaileekiko elkartasunerako, ezta kudeaketa propioz garatutako irtenbideetarako ere. Soilik Europa Batasunaren politika kriminalak hitzez hitz segitzen dituen estatu baten karitatea, espetxeratzea, bazterketa eta deportazio berezitua onartzen dira".