Eraso matxisten kontrako kanpainaren karietara, "gune ez seguruak" markatuko dituzte emakumeek. Iruñeko Udalak deialdia egin du, eta bilera horren ostean apuntatuko dute zeintzuk diren txoko ilun horiek.
Kondestable jauregian izanen dira saioak, ekainaren 2an eta 7an, goizez 10:00etatik 12:00etara eta arratsaldez 19:00etatik 21:00etara. Edozein emakumek har dezake parte, aldez aurretik izena emanda 010 telefonoan (edo 948420100 zenbakian Iruñetik kanpo deituz gero).
"Eraso sexistarik gabeko hiria" eraikitzea da asmoa, udalaren esanetan, bai eta emakumeek "berdintasunean eta askatasunez" gozatu ahal izateko espazioak sortzea.
"Espazio publikoa, eta areago sanferminetan, sexu/genero botere harremanak egituratzeko berariazko testuingurua da", esan du udalak. Hala, "egituraketa espazialek eta sozialek eragiten dute emakumeek festa bizitzeko dauzkaten formetan".
Ondorioz, "espazio horiek transformatzeko" egitasmoak jarri nahi dituzte martxan.