Uztailaren 1ean jakinen dute selektibitateko bigarren deialdian azterketa eginen dutenek proba gainditu duten edo ez. Gaur hasiko dira unibertsitateko ikasketak egiteko probak egiten eta ostiralean amaituko dute. 527 ikasle ariko dira Iruñeko eta Tuterako unibertsitate-campusean azterketak egiten. Bi faseetarako eman dute izena gehienek, 403 ikaslek: fase orokorrerako eta arlo espezifikoetarako.
Gaztelania eta Literatura azterketa izanen da egiten lehena. Historia eta filosofiaren artean aukeratu beharko dute gero. Arratsaldean atzerriko hizkuntzako azterketak izanen dituzte. Bihar euskara eta literatura proba izanen dute 08:30ean. Biologia, greziera, musika, fisika eta matematika etorriko dira gero. Arratsaldez gizarte eta ingurumena, artearen historia, latina eta marrazketako azterketak izanen dituzte. Ostiralean emanen diote amaiera: geografia, kimika, musikaren historia, dantza eta teknologia izanen dituzte gainditu beharrak.