Krisiak eztanda egin zuelarik, txirotasun larriak nabarmen egin zuen gora Nafarroan. Orduan egoera horretan erori ziren pertsonak orain "enkistatzen" ari dira. Zailtasun handiak dituzte egoera horretatik irteteko. Orotara 30.000 lagun dira, biztanleriaren %5 gutxi gorabehera, 2007an zirenen halako hiru. Hori guztia eta gehiago dio NUPeko Berdintasuna eta Integrazio Soziala Lortzeko Ikerketa Katedrak krisiaren eragin sozialari buruz egin duen txostenak.
Atzo aurkezturiko txosten horren arabera, txirotasun larritik irteteko arazoak gero eta handiagoak dira; izan ere, enplegua sortzen ari da, bai, baina kalitate urrikoa, behin behinekoa, soldata baxukoa, eta horren poderioz langile txiroaren figura berragertzen ari da.
Txostenak 2007-2014 epea aztertu du, eta gogor kritikatzen ditu Nafarroako Gobernuak batez ere 2011tik aurrera alor honetan egindako murrizketak. "Nafarroako Gobernuak ibili duen integrazio estrategiari mamia falta zaio. Gizartea alor honetan politika ausart, eraginkor eta irudimentsuak eskatzen ari da. Arazo honi behar bezala aurre egiten ez badiogu, arazo honek aurretik eramanen gaitu", azaldu du katedrako zuzendari Miguel Laparrak.