Iruñeko udaleko garabi zerbitzuek gaizki aparkatutako automobilak Irunlarrea kaleko lur azpiko aparkalekura eramanen dituzte hemendik aurrera. Zerbitzua aldatu du udalak eta ospitale inguruko aparkalekuak hartu du astelehenetik aurrera garabien gordailua. Horretarako, aparkalekuko lehen solairua erabiliko da.
Dornier Empark enpresak kudeatuko du Iruñeko udaleko garabi zerbitzua. Aparkaleku berrian 57 automobil hartzeko tokia izanen da. Bateratuak daude telefono bidezko zerbitzua eta informatikoa, horrek erraztuko ditu gordailutik kotxea erretiratzeko eman beharreko pausoak.
Justizia jauregiko aparkalekua konpondu arte
Otsailaren 7an Justizia Epaitegiko lur azpiko aparkalekua hondoratu zen. Konponketa lanetan ari dira, baina, bien bitartean, garabien gordailua Irunlarreako aparkalekuan izanen da.