Katebegi galdua

Argazkiaren ordez marrazkia daukagu gaur. Zaldieroaren marrazkia, entziklopedia izateko bidean doan De Rerum Naturakoa.
Katebegi galdua lehen planoan, mendi beltzaren gaineko paisaia apokaliptikoan, begitartea haserre, eskuineko eskua garrote den makilan bermatuta, eta dio: “Ez baditut euskaldunak maite, zergatik jartzen dizkidate begien aurrean?!”. Segidan, hondoko planoan katebegi galdua, lehen baino haserreago, garrotea altxata mehatxuka –imajinatu ahots gogor agintaria-, eta botatzen du: “Euskaldunak aintzat ez hartzeko eskubidea zanpatzen ari dira!!”.
Ez dakit Zaldieroak hori marraztu zuenerako ba ote zekien tiraren azpian gaur zer joango zen. Hizpideak atalean Ainhoa Oiartzabalek, “Napartheid” izenburupean, Nafarroako Parlamentuaren atzoko saioan onartutako tramiteari buruz idatzi du; alegia, nola hamaika herri mugitu ahal izango diren eremu ez-euskaldunetik eremu mistora. Horraino, ondo goaz. Kontua da atzoko saio horretan PSNek ere kontra bozkatu zuela eta salatu –kakotxak- “euskara ofizial bihurtzea dela benetako asmoa”.
Hori esan zuen Inma Jurío parlamentariak katebegi galduaren kofradiakoa dela erakutsi zuen, Parlamentuaren atzoko saioan.