Salestarren Udalerriz Gaindiko Planaren Kontra azaldu da Iruñeko udala, eta Zabalgunearen berezko eguturarekin bat egiten duten alternatibak bilatzeko deia luzatu die Nafarroako Gobernuari eta Salestarrei.
Izan ere, UPN gobenuan zela onartu zen salestarrek Iruñean duten orube batean etxebizitzak eraikitzea. Ez dira nolanahiko eraikinak, gainera: hamazazpi solairu izatea aurreikusi dute, hau da, zonaldearen berezko egitura baino askoz altuagoak izanen lirateke. Hori izan da udalak kontra azaltzeko aipatutako arrazoietako bat: etxe altu horiek Iruñearen ‘skyline’ delakoa hautsiko lukete, alegia, hiriaren profilaren gainetik altxatuko liratekeen dorreak liratekeela. “Desastre hutsa” Joseba Asiron alkatearen hitzetan.
Irabazirik ez
Hori gutxi balitz, hezkuntzara zuzenduriko orube hori etxebizitza pribatuak eraikitzeko bideratzerakoan, sailaren balioa handitzen da, eta, horren ondorioz eskaera argia egin du udalak: bertatik ateratako plusbalioa salestarrek ikastetxe berria eraikitzeko erabil dezatela, baina, horrez gaindiko plusbalioa egonez gero, Nafarroako Gobernuarentzat izatea eta ez salestarrentzat. Auzi honen harira, “espekulazioa” aitatu du Asironek.
Ilde beretik,bigarren eskari bat ere egin du udalak: PSISa, Udalerriz Gaindiko Plana moldatzeko, hamazazpi pisuko dorre horien eraikuntza ekiditeko, eta Zabalgunearen egiturarekin bat eginen duten "alternatibak" bilatzea.
Nafarroako Gobernuarne esku
Salestarren egitasmoaren aurka egon, bai, baina, gaur gaurkoz, praktikan, egiteko deus gutxi du Iruñeko Udalak, Nafarroako Gobernuak baitu azken hitza. Exekutiboari eta Salestarrei dagokie erabakitzeko ardura, PSISari esker, eta, biek ala biek, aurrera segitzeko asmoa azaldu dute. Hori bai, Nafarroako Gobernuak esan du kosturik ekartzen ez badio garatuko duela obra.