Lantaldea arintzeko prozesua bizkortzeko asmoa omen dauka TRWren Landabengo lantegiko zuzendaritzak eta hori dela eta atzera bota du kaleratze kolektiboaren alternatiba gisa langileek mahai gainean jarritako proposamena. 55 eta 59 urte bitarteko 130 langileek bost urtean erretiro aurreratu hartzea nahi zuen enpresa batzordeak. Edonola ere, konpromisoa hartu du datorren astelehenean eskaintza berri bat helarazteko langileei. Nafarroako Gobernuko presidente Uxue Barkosek, berriz, oso bestela hartu du langileen proposamena, "begi onez", uste baitu gobernuak galdegin eta defendatutakoaren ildotik doala.