Hemen gara izan da Iruñerriko Euskal Jaiaren leloa. 27 taldek antolatuta, ekitaldi ugari eta jendetza bildu ziren larunbatean Iruñeko Alde Zaharrean. Laugarrenez antolatu zuten Euskal Jaia: "Ezkutaturik nahi gaituzte, baina, hemen gara, Iruñean, eta hemengoak garelako maite dugu euskal kultura", hala nabarmendu zuten antolatzaileek. Iruñean euskal kulturak merezi duen tartea aldarrikatzeko azken Euskal Jaia izatea da antolatzaileen helburua, horrek adieraziko baitu hirian gauzak aldatu eta euskararen alde eta euskal kulturaren alde egiteko alderdi berriek gidatuko dutela Udala.
Goizeko hamarretan ekin zioten jaiari. Estafeta eta Jarauta kaleetan gosaldu eta kalejiran abiatu ziren Alde Zaharrean barna. Dantzariak, joaldunak, erraldoiak, buruhandiak, trikitilariak, txarangak eta fanfarreak izan ziren protagonista. Larrain dantza elkarrekin dantzatuta erraldoien topaketa izan zen Gazteluko plazan. Bertan izan ziren sei auzotako erraldoien konpartsak.
Arratsaldean izan zen aurtengo Euskal Jaiaren berrikuntza: Kaldereria kaleko tabernek hainbat kontzertu antolatu zituzten: Alicate, La gramola del amor, Legeak erre, Musikharian eta Khous. 21:30ean Jarana peñan zen hitzordua. Benation eta Chotakabra taldeek eskaini zuten kontzertua.
27 talde, bat eginda
Elkarteak, Iruñerriko dantza taldeak, peñak eta auzoetako erraldoien konpartsak izan ziren laugarren Euskal Jaia antolatzeaz arduratu zirenak.