#MartesTIC izeneko zikloaren barruan bihar teknologia berriek hitzordua izanen dute Arrotxapeko Juslarrotxa Civivoxean, 19:00etan, software librearen aukera guztiak aztertzeko saioan. Aste honetako lantegia euskaraz izanen da, telekomunikazio-ingeniari eta artista digital José Luis Asensioren eskutik. Parte-hartzea librea da.
Asensiok azalduko duenez, gero eta doako informatika-programa gehiago daude, batez ere eskolan, eta software librea erabiltzeak alde positibo asko ditu, eta eguneroko ekintza telematiko asko egitea ahalbidetzen du, funtzionaltasun berdinarekin. Gainera, jasangarritasun ekonomikoaren eta etikaren arteko oreka mantentzen duela nabarmenduko du Asensiok. Bihar, asteartearekin, emanen duen lantegian bereziki aztertuko dira hainbat ofimatika-, diseinu- eta multimedia-programa.
Informatikari buruzko mintegi eta lantegien #MartesTIC zikloaren barruan aurreikusitako zazpi jardueren bosgarrena izanen da biharkoa. Ziklo hau Civivox sareko zentroetan egiten da, urteko lehen hiruhilekoaren programazioaren barruan. Hurrengo saioetan -martxoaren 14an eta 28an egitekoak diren horietan- gaurkotasuna duten eta interesa pizten duten beste gai batzuk landuko dira, hala nola 3D inprimagailuak eta Interneten eta aplikazioen erabiltzaileen eskubideak eta pribatutasuna.