Iruñerriko euskaldunon agerkaria
euskalerriairratia.eus

Euskarazko eskaintzak eskariak baino txikiagoa izaten jarraitzen du Iruñeko udal haur eskoletan

Euskalerria Irratia 2017-01-10 14:02   Euskara  Iruñea

> Familien %38,5ek matrikulatuko lukete 0-3 urte arteko haurra euskaraz, baina %26,6k baino ezin izan dute egin, Iruñeko Udalak gaur kaleratutako inkestaren arabera.

> Aurten euskarazko haur eskola gehiago zabalduko ez dituztela esan du Maider Beloki kultura zinegotziak.

Hamabi udal haur eskoletatik lau baino ez dira euskaraz, heren bat; eta, hala ere, iaz baino bi gehiago dira, izan ere, bi eskola ereduz aldatzea erabaki zuen Iruñeko Udalak, eskuinaren kritika artean. Eta, hala ere, Taller de Sociologia enpresari udalak berak eskatutako inkestak frogatu du eskaintza ez dela nahikoa: euskaraz matrikulatuko lituzkete haurrak gurasoen %38,5ek, baina %26,6k baino ez dute aukera izan. Nolanahi ere, "aurten, printzipioz" ez da beste aldaketarik egonen. Maider Beloki kultura zinegotziak esan du iaz egindako aldaketak zertan diren ikusi nahi dutela aurrena. 

"Egin ditugun aldaketa linguistikoak ongi eginak daude, norabide onean gaude". Baikor mintzatu da, iaz hizkuntza ereduz aldatutako bi euskarazko haur eskolak gogoan. Halaber, UPNk ,30 urtean, "euskarazko plaza bat bera" ere atera ez zuela gogorarazi du, "sektarismoa" leporatzearekin bat, euskarazko datuak bildu ere ez zituela egin: "Bazterkeria konfirmatzen da".

1.012 familien hitza

Ume txikiak dauzkaten 1.012 familia elkarrizketatu dituzte haur eskolen egoeraren inguruan eta horietatik haur eskolen erabiltzaileak edota erabiltzaile potentzialak direnen artean, hau da, 304 familien artean, %53 konforme daude hizkuntza ereduarekin.

Inkestaren fokua haur eskolen egoera orokorrean jarri nahi dutela esan du Maider Beloki kultura zinegotziak, ez dutela soilik hizkuntza eredua erdigunean jarri nahi eta bestelako ezaugarriei erreparatu dietela, "gertutasunari, pedagogiari eta azpiegiturei", bestek beste. 

"Kalitatez eskola publikoa nahi dugu, oraingo araudiarekin bat egiten duena, eskaintza linguistiko orekatuarekin eta proiektu pedagogiko moderno eta eguneratua duena", adierazi du.

 

Erantzunak

Erabiltzailearen aurpegia Sortzen 2017-01-10 15:51 Erantzuna | #1

Datu hauek ikusita, ez ulertzeaz gain, salatzen dugu Nafarroako Gobernuko Migel Laparra kontseilariak gidatzen duen Sailak izaten ari duen jarrera. Iruñeko Alde Zaharreko Haur Eskolaren inguruan ari gara. Historikoa jo dezakegu auzo horretako gurasoek daramaten borroka. Urteetako aldarrikapena. Sinadura bilketak, kontzentrazioak, giza kateak, kale inkestak, zerrenda ezinezko bilerak alderdi politikoekin ... Eta orain? hutsikeria? partxeak?. Ez, mila esker ! Gureak diren eta gure haurrenak diren eskubideaz ari gara.
Nahikoa da! Aldaketa euskaraz izan behar du, bestela ez da aldaketa. Sortzen Elkartetik, datorren matrikulazio kanpainan Haur Eskola honen hizkuntza eskaintza aldatu ezean, iruzur baten aurrean gaudela salatuko dugu. Nahikoa da ! Alde Zaharrean Haur Eskola Euskaraz, orain !

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa