ARTEDRAMA & Le PTDP & DEJABU TEATROAk Francoren bilobari gutuna aurkeztuko du Nafarroako Antzerki Eskolan. Iñakik hamar urte eta leuzemia ditu. Joxanek berrogeita sei urte eta gerra zibileko obus baten txatala buruan. Etorkizun bideragarririk ez duen ospitalean iragana eta oraina kateatzen dira Migel eta Kristina medikuen ametsetan. Itxarongeletan sekula agertzen ez diren pazienteen izen zerrendak entzuten dira ordena alfabetikoan eta Carmen Martinez-Bordiuk betetzen du bihotzeko aldizkari maiztuaren azala.
Iraun beharraren gaitzak jotako komunitate baten hezurren eta gezurren erradiografia traumatologikoa da Francoren bilobari gutuna.
FITXA ARTISTIKOA:
Zuzendaritza: Ximun Fuchs. Egileak: Unai Iturriaga eta Igor Elortza. Antzezleak: Ander Lipus, Patri Urrutia, Manex Fuchs, Zoila Berastegi, Urko Redondo, Pako Revueltas eta Erika Olaizola. Argiak: Josep Duhau. Koreografia: Philippe Ducou. Musika: Asier Ituarte. Eszenografia: Jose Pablo Arriaga.
Sarrerak Nafarroako Antzerki Eskolan eskuratu daitezke, dela bertako leihatilan, dela bere webgunean (8 € eta 5€ ikasle-taldeak).