Hamabost dira orotara indarkeria sexista dela eta Poliziak atxilo hartutakoak. Azken hirurak atzo atxilotu zituzten, Labriten, Foruen plazan eta Tafalla kalean eraso egitea leporatuta.
Erasoak jasan dituztenek salaketa egitea garrantzitsua dela nabarmendu dute larrialdi zerbitzuek, eta herritarrei ere dei egin diete berdin jokatzera.
Joseba Asiron Iruñeko alkateak eraso sexistak "onartezinak" direla esan du Euskalerria Irratiaren Sanfermintza saioan. Era berean, Iruñea "hiri segurua" dela azpimarratu du. Haren hitzetan, gakoa ez da eraso sexista gehiago egon denik, baizik eta "kontzientziazio maila handiagoari esker" gehiago salatu dela.
"Nazka ematen digute eraso sexistek; herritarrek ere hala salatu dute kalean", esan du. "Sanferminak seguruak dira, arazoa gizartearena da. Bada zerbait eragozten duena emakumeak libreki kalera ateratzea". Bide horretatik, orain gertatzen direnak lehen ere gertatzen zirela adierazi du.
Hezkuntzan dago irtenbidea. Hala uste du Iruñeko alkateak: "Errespetua zor diogu elkarri eta baloreetan hezten segitzeko beharra dago". Mugimendu feministaren lana goraipatu du Asironek, eta udalarekin izandako elkarlanak fruitu asko eman dituela uste du: "Eurek erakusten digute erakundeek zein bide jorratu behar dugun, berdintasuna xede izanda".