Artistek eta sorkuntzak hartuko dituzte Arrosadiako kaleak 'Artisten Auzoa'-n. Aurtengoa zortzigarren aldia izanen da; aurreko guztiak Alde Zaharrean izan dira. Baina Arrosadiara mugituta ere, aurreko edizioetako espirituari eutsiko diote: artista guztientzat zabaldutako espazioa izanen da, nahi duen horrek har dezake parte. Hala, "aldaketa erreminta gisa" erabiliko dute artea, "auzoa sortzeko" bai eta "kulturen arteko elkarrizketa sortzeko" ere.
Arrosadian, gainera, bertako dendak, eragileak, liburutegia, gizarte zerbitzuak eta beste ere inplikatuko dituzte.
Iruñeko Udalak honakoak jarriko ditu: oholtzak, karpak, musika ekipoak, aulkiak eta mahaiak eta muralak margotzeko margoa, besteak beste. Materialak ez du 15.000 euroko kostua gaindituko.
Artisten Auzoa dinamikaren webgunean eskuratu daiteke informazio gehiago. Argazki Galeria osatu dugu 'Artisten Auzoa' dinamikaren iazko argazkiekin.