Alde Zaharreko Segurtasun eta Eraberritze Plana onartu berri du Iruñeko Tokiko Gobernu Batzordeak. Orain, Nafarroako Boletin Ofizialean argitaratu, eta helegiteak jasotzeko ordua da. Hari so zirriborratu daiteke jada zer nolako traza hartuko duen hemendik bi urtera indarrean sartuko den Ostalaritza Ordenantzak, gerora aldaketak izan baditzake ere.
Berrikuntza multzo bat iragarri dute. Esaterako, tabernen arteko gutxieneko distantzia markatu dute, saturazioa saihesteko; janari beroa saltzen duten lokalek 00:00etan itxi beharko dituzte jabeek, egun baino ordubete beranduago; patioak "salbuespen gisa" irekitzeko aukera ere zabaldu da, beti ere "publikoaren erabilpenerako espazio" sailkapenean aurretik baldin badaude; eta tabernen azalera %25 handitzeko eskainiko du ordenantzak, baldintza jakin batzuk beteta. Bete beharreko arauei dagokienez, musika murritzaile bat ere izan beharko dute ostatu guztiek, manipulatu ezinezkoa, eta udalaren oniritzia duena.