Autoek hegemonia gal dezaten hori da xedeetako bat, oinezkoak erdigunean jartzearekin batera. "Lehentasuna" izanen dute oinezkoek. Hori xede, makina bat neurri iragarri dituzte: Bizikletak errepideetatik joateko bideak, egokitutako semaforoak eta soilik autobusentzako erreiak, esaterako.
Bide horretatik, obrak iragarri dituzte "bizikletak espaloitik atera eta errepideetara pasa daitezen". Autoek bizikleten abiadura errespetatu beharko dute, eta bi errei daudenean baino ezinen dituzte aurreratu.
Hala, espaloitik 14 urtetik beherakoak eta haurrekin doazenak baino ezinen dira pasatu.
Hiru sail ari dira irailerako prest egonen den plana prestatzen: Etxebizitza eta Bizigarritasunekoa, Hiri Ekologia eta Mugikortasunekoa eta Bizikidetza eta Gizarte Segurtasunekoa.