Egitaraua goizeko 10:00etan hasiko da. Ordu horretan Iruñeko Udalak -alkateaz gain alderdi guztietako kideak izanen dira- harrera egingo dio Euskaltzaindiari. Joseba Asiron alkateak eta Andres Urrutia euskaltzainburuak hartuko dute hitza eta ondoren Udalak eta Euskaltzaindiak opari bana egingo diote elkarri.
Ondoren Osoko bilkura egingo du Akademiak. Bilkura horretan Euskaltzaindiak euskaltzain urgazle berriak izendatuko ditu. Honetaz gain Glosario Parlamentarioa (I) aurkeztuko da. Hiztegi Juridiko-Parlamentario biltzeko lantaldea Euskaltzaindiaren koordinaziopean ari da lanean eta Eusko Legebiltzarreko, Nafarroako Parlamentuko, Eusko Jaurlaritzaren IVAPeko eta Arabako, Gipuzkoako eta Bizkaiko Batzar Nagusietako zenbait kidek osatzen dute. Taldeak parlamentu-lexikoa bateratzea du xede, ondoren Hiztegi Juridiko-Parlamentarioa osatu ahal izateko. Lan horren lehenengo emaitza aurkeztuko da Euskaltzaindiaren Osoko bilkuran.
Miguel Angel Urmenetaren omenez
Bestalde, arratsaldean, 16:30ean, Miguel Angel Urmenetaren omenezko ageriko bilkura egingo du Euskaltzaindiak, Kondestablearen Jauregian. Egitaraua:
- Andres Urrutia, euskaltzainburua
- Patxi Zabaleta: “Miguel Javier Urmeneta euskararen laguntzailea Nafarroan”
- Asisko Urmeneta, komikilari eta ilustratzailea. Miguel Javier Urmenetaren semea
Iruñeko Udaletxean izan zen jada Euskaltzaindiaren beste bilkura bat, 2013ko irailean. Euskaltzaindiak hilean behin egiten ditu osoko bilkurak, eta Akademiaren irizpideei jarraituta urtean behin gutxienez biltzen da bere hizkuntza-eskumenari dagokion lurraldeetako bakoitzean.