Iruñeko Udalak zenbait jarduera eginen ditu hiriak duen bizikletentzako bidea hobetze aldera. Gabriel Viedma Hiri Segurtasunerako zinegotziak proposatu ditu ekimen horiek. Hainbat neurri dira hartuko dituztenak: errepidea gurutzatzen duten bide-gorriek seinale bertikalak izanen dituzte, horrek eragina izanen du 84 zebra bidetan eta bizikletentzako bideen 42 kilometro berriz pintatuko dituzte.
Bizikletan doazenen eta oinezkoen arteko segurtasuna areagotzeko neurriak ere hartuko dituzte. Barañaingo etorbidea eta Miluze kalea lotzen duen bide-gorria hesiekin babestuko dute. Beste zenbait gune finkotan ere berrituko dituzte seinaleak eta segurtasunerako neurriak: Abejeras, Aita Andoain, Pio XII.aren eta Nafarroako etorbidearen artean. 23.646 euroko inbertsioa eginen du Udalak guztira.
Ezkaban eta Buztintxurin badira seinale bertikalak
Lehen ekintza seinale bertikalak ezartzea izanen da Ezkaba eta Buztintxuri auzoetan dauden moduan. Modu horretan, errepidean dabiltzan autoak errazago jakinen dute bizikleta batek noiz zeharkatuko duen bidea. 84 zebra bide inguruetan jarriko dituzte seinale bertikalak, guztira 155.
Autoek ezinen dute bide-gorriaren bazterrean aparkatu
Miluze kalearen eta Barañaingo etorbidearen arteko bide-gorrian ezin izanen dute kotxeek aparkatu. Izan ere, horrek egoera arriskutsuak sortzen ditu kotxeen, bizikleten eta oinezkoen artean. Bide gorriari hesia ere jarriko diote gune horretan.